Podemos aproveitar o día a día para que os pequenos e pequenas vaian escribindo pequenos textiños que teñan significado para eles/elas:
- Poden escribirlle unha pequena carta, unha mensaxe ou un e-mail a algunha persoa que boten en falta.
- Se tedes que ir mercar algúns produtos, poden escribir a listaxe da compra. Tamén poden facela con recortes de publicidade de supermercados.
- Se preparades un biscoito, poden escribir o nome ou a receita.
- Se tedes tarefas pendentes, poden facer a listaxe.
- Traballar cos días do calendario e, por exemplo, nomear palabras que comecen polo mesmo fonema que o día de hoxe (/ɭ/ de luns: lúa, león, luz...).
- Xogar ao bingo das letras.
Tamén poden escribir os seus nomes, o doutras persoas próximas ou outras palabras, de diferentes maneiras:
- Con lapis, bolis ou rotus.
- Con letras de sellos, se tedes na casa.
- Con letras de xornais ou revistas. Terán que buscar as letras que compoñen o nome ou palabra, recortalas e logo pegalas nun folio, cartolina ou libreta.
- Con letras móbiles, se tedes (tamén podedes improvisar unhas empregando cartóns que teñades polas casa, papel, pinzas de madeira ou tapóns de bricks).
En canto á lingua oral, ademais das moitas conversas que manteredes ao longo destes días, poden:
- Xogar con disfraces.
- Cantar cancións.
- Xogar ás adiviñas, recitar trabalinguas e/ou adiviñas.
- Xogar a xogos sonoros ou de rimas (de dedos, coas mans…)
- Chamar por teléfono a algún/nha compañeiro/a, incluso mediante videochamada.
- Facer teatro.
Animámosvos a que realicedes estas actividades na casa, así coma outras que vós queirades e nolas enviedes mediante as canles de contacto coas escolas, que vos lembramos a continuación:
Comentarios
Publicar un comentario